Piemontese/Bibbia/Vej Testament/Salm/66

Da Tempo di Riforma.

Ij Salm

Salm 66

Ël poeta a làuda Nosgnor përchè a l’ha delivrà sò pòpol da na crisi.

  • (1) Për ël diretor dla mùsica. Da canté. Un Salm. Crijé fòrt vòste làude a De da tuta la tèra.
  • (2) Canté ‘d làude për la maestà ‘d Sò nom. Dèje l’onor ch’as mérita!
  • (3) Dì a Nosgnor: “Lòn ch’it fas a l’é dabon ampressionant! Për motiv ëd toa granda potensa, dëdnans a Ti ij tò nemis as fan cit për la tëmma.
  • (4) Tuta la tèra as buta an gënojon dëdnans a Ti e a canta toe làude. A canta ‘d làude a tò nom! (Selah).
  • (5) Vnì, e esse testimòni dj’antraprèise [1] ‘d Nosgnor! Lòn che Chiel a fà an favor ëd sò pòpol a l’é dabon ‘mpressionant! [2]
  • (6) A l’ha cangià ‘l mar an tèra sùita. A l’han passà ‘l fium a pé. Arlegromse ‘d Chiel ambelelà!
  • (7) Nosgnor a dòmina con sò podèj për sèmper! A varda bin lòn ch’a fan le nassion. Ij rivoltos [3] testard a dovrìo nen tant fé ij galèt! [Selah].
  • (8) Laudé Nosgnor, ò vojàutre tute le nassion! Con viva vos fé sente vòstre làude a Chiel!
  • (9) Chiel a guerna nòstra vita e a l’ha nen lassà che ij nòstr pé a sghijèisso.
  • (10) Përchè Ti, o De, it l’has butàne a la preuva, it l’has mondane coma ‘d argent arfinà.
  • (11) It l’has fàne tombé ant un trabucèt, it l’has fàne tribulé [4].
  • (12) It l’has lassà che dj’òm a cavalchèisso dzora nòste teste
  • (13) I l’oma passà travers ël feu e travers l’eva; peuj, nopà, it l’has portàne fòra ant un pòst largh e duvert.
  • (14) I intrëraj an tò templi con dij sacrifissi complet, i compiraj ij vòt ch’i l’hai fàte.
  • (15) I t’ufriraj ‘d bestie butà a l’angrass coma ‘d sacrifissi complet, ansema l’odor dij moton sacrificaj.
  • (16) Ven-e, scotè, ò vojàutri ch’i seve fidej a Nosgnor! Iv contraj lòn che Nosgnor a l’ha fame.
  • (17) A vos àuta i l’hai ciamà Sò agiut e i l’hai laudalo con mia lenga.
  • (18) Se mi i l’avèissa coà ‘l pecà ant ël mè cheur, lë Sgnor a l’avrìa nen scotame.
  • (19) Nopà, Nosgnor a l’ha scotà, a l’ha scotà mia sùplica.
  • (20) Nosgnor a merita ‘d làude, përché chiel a l’ha nen arfudà mia sùplica, nì chità a vorèjme bin!

Nòte

  • [1] At, assion, lòn ch’a fa.
  • [2] O “Lòn che Chiel a fa a l’é ampressionant e motobin pì grand che qualsëssìa còsa che l’òm a podrìa mai fé”.
  • [3] Al podèj ëd Nosgnor.
  • [4] O “seufre”.